Rrustem Mustafa, ish-komandanti i Ushtrisë Çlirimtare të Kosovës (UÇK), ka filluar dëshminë e tij në Gjykatën Speciale në Hagë, në rastin ndaj ish krerëve të UÇK-së.
Në një seancë publike, Mustafa u pyet për një dokument nga prokuroria ku sipas saj jepen udhëzime si të veprohet me gazetarët, vëzhguesit dhe diplomatët, e ai tha se nuk i kujtohet ky dokument.
Mustafa deklaroi se personat tek zyra për informim me Publikun në zonën Operative të Llapit i ka caktuar vetë.
Komandant Remit po ashtu iu kërkua nga prokuroria t’ua thotë emrat e zyrtarëve.
“Ky dokument s’po më kujtohet tash. Tre ose katër persona kam pasur në zyrën për informim publik. Ismet Cakiqi, Lirak Çelaj, Hysen Fazliu dhe eprorët e lartë të zonës si shefi i Shtabit, zëvendësi i tij si dhe komandantët e brigadave”, ka thënë Mustafa.
“UÇK, shtrirja e saj në terren dhe raporti me vëzhguesit të OSBE-së. Prishtinë, 19.11.1998”, lexoi një dokument Mustafa dhe u pyet nëse e njeh nënshkrimin në këtë dokument nga prokuroria.
Prokurorja tutje e pyeti Mustafën: “Fatmir Humolli është përcaktuar si ndërlidhësi në zonën e Llapit? “, ndërsa Mustafës tha se: “Ky emër më së paku është marrë me këtë çështje. Mund të jetë takuar e caktuar por unë s’paskam ditur asgjë”.
Ndërkaq, seanca e Gjykatës shkoi në pushim të drekës.
Ndryshe, Rrustem Mustafa ditë më parë ishte ftuar për të dëshmuar në këtë gjykatë nga Zyra e Prokurorit të Specializuar në Dhomat e Specializuara në Hagë.
