Është ndërprerë seanca e shqyrtimit fillestar ndaj Bedri Shabanit dhe Muharrem Qerimit, të dyshuar për spiunazh.
Seanca fillestare është ndërprerë, pasi që Bedri Shabani kërkoi kohë më shumë për ta lexuar aktakuzën e më pas për t’u deklaruar.
Ndërkohë edhe avokati mbrojtës i tij, Besnik Berisha, deklaroi se Shabani e ka të pamundur të deklarohet sot.
“Shabani e ka të pamundur të deklarohet sot, pasi që pak para se t’ia nis seanca, atij i është dhënë aktakuza. Duke qenë se aktakuza është voluminoze, nuk ka pasur kohë që analizojë dhe ta kuptojë secilin pretendim kundër tij”, tha Berisha.
Ndërkaq, Muharrem Qerimi, deklaron se e ka kuptuar aktakuzën.
Prokuroria Speciale e Republikës së Kosovës (PSRK) më 19 shkurt 2025 ka ngritur aktakuzë ndaj Bedri Shabanit dhe Muharrem Qerimit, të cilët i ngarkon se kanë mbledhur dhe dërguar informacione e dokumente tek BIA serbe lidhur me Ushtrinë Çlirimtare të Kosovës, eprorët e pjesëtarët e saj, Policinë, Agjencinë e Kosovës për Inteligjencë e Inspektoratin Policor të Kosovës, si dhe për ngjarje e objekte specifike, përfshirë edhe një masakër.
