Këshilltarja lokale e Bashkimit Evropian, Kati Schneeberger, e ka quajtur të padrejtë kushtin e ri që Kosova të formojë Asociacionin e Komunave me shumicë serbe, nëse dëshiron anëtarësimin në Këshillin e Evropës.
Duke folur për gazetën “Bota sot”, zyrtarja evropiane, ka thënë se ky vendim i shteteve anëtare, është dobësi dhe zbutje ndaj presidentit të Serbisë Aleksandar Vuçiq.
“Lejimi i vendosjes së kushteve të reja pas rekomandimit të Asamblesë Parlamentare të Këshillit të Evropës, për të mirëpritur Kosovën si anëtare të Këshillit të Evropës është jo vetëm i padrejtë, por edhe tregon dobësi ndaj Vuçiqit. Me këtë zbutje ndaj Vuçiqit, ne po e lejojmë që ai t’i përcaktojë vetë rregullat në Evropë. Të gjithë bëjnë atë që Vuçiq dëshiron ose nuk dëshiron”, ka deklaruar ajo.
Kati Schneeberger
Sipas saj, kryeministrit të Kosovës Albin Kurti, i është hedhur faji për situatën e krijuar pas dështimit të Kosovës për anëtarësim në KiE, mirëpo, siç ka theksuar Schneeberger, problem është te Vuçiqi, i cili nuk do që t’i përmbush detyrimet e tij në raport me Kosovën.
Ajo vlerëson se Vuçiq dëshiron të marrë gjithçka, pa dhënë asgjë.
“Vuçiq nuk e do Kosovën në Këshillin e Evropës, kështu që ne krijojmë kushte të reja për të vonuar më tej procesin. Edhe një herë, faji për gjithë situatën po i vihet Kurtit. Por, është Vuçiq ai që po bën kërkesa, por nuk është i gatshëm të kthejë asgjë. Kushdo që beson se Vuçiq do të përmbushë qoftë edhe një nga detyrimet e tij pas zbatimit të Asociacionit të Komunave me shumicë serbe është naiv. Çfarë do të humbte Vuçiq nëse do të toleronte anëtarësimin e Kosovës në Këshillin e Evropës, por Kurti më pas nuk do ta zbatonte Asociacionin? Ai ende mund të priste të zbatonte të gjitha detyrimet e tjera. Por nëse Asociacioni zbatohet dhe Vuçiq ende bojkoton anëtarësimin në Këshillin e Evropës, çfarë mund të presë Kurti? Asgjë. Vuçiq dëshiron të marrë gjithçka, por nuk jep asgjë. Disa ende nuk duan ta shohin këtë”, ka thënë këshilltarja në BE.
Më tej, Schneeberger ka akuzuar BE-në, duke thënë se po bëhet «kukull» e Vuçiqit dhe presidentit rus Vladimir Putin. Ajo ka kërkuar zgjimin e Evropës kundrejt “manipulimit” nga Vuçiq dhe Putin.
“Me këtë mbështetje për Vuçiqin, ne po lejojmë që Evropa të bëhet një kukull, një idiot i dobishëm për Vuçiqin, por edhe për Putinin. Të dy po mësojnë edhe një herë se gjithçka që duhet të bëjnë është të kërkojnë gjithçka që duan dhe ne do t’u japim me dëshirë gjithçka që ata kërkojnë. Ne po ua shesim shpirtin këtyre autokratëve. Ne po dobësojmë demokracinë tonë, kohezionin tonë dhe si rezultat do të humbasim gjithçka: lirinë, demokracinë tonë, paqen tonë.
Më në fund duhet të zgjohemi dhe të kuptojmë se po manipulohemi nga Vuçiq dhe Putin. Më në fund duhet të fillojmë të mbrojmë demokracinë dhe lirinë tonë me vendosmëri. Kjo kërkon guxim, kërkon forcë. Ne duhet t’i rifitojmë të dyja sa më shpejt që të jetë e mundur”, është shprehur Kati Schneeberger për gazetën “Bota sot”.
Në fund, zyrtarja evropiane ka kërkuar anëtarësimin e Kosovës në KiE, pa plotësim të kushteve të reja.
“Kosova duhet sa më parë të bëhet anëtare e Këshillit të Evropës, pa kushte të reja. Kjo taktikë vonuese është vetëm në interesin e Vuçiqit për të penguar Kosovën të bëjë ndonjë përparim. Por ne kemi nevojë për progres, jo stagnim apo regres në Evropë. Ne duhet të vazhdojmë të rritemi së bashku në mënyrë që të jemi më të fortë kundër armiqve tanë nga jashtë, siç është Rusia, e cila nuk po bën vetëm luftë kundër Ukrainës, por luftën e saj hibride kundër të gjithë Evropës dhe Perëndimit”, ka deklaruar ajo për “Bota sot”.
Schneeberger të shtunën ka vizituar katër komunat në veri të Kosovës. Ajo ka zhvilluar një aksion në Mitrovicë, Zveçan, Zubin Potok dhe Leposaviq. Në duar ajo ka mbajtur pankartën “Kosovës i duhet KiE dhe BE, e jo Asociacioni”.
Kosova dështoi të përfundojë procesin e anëtarësimit të saj në Këshillin e Evropës, ndonëse ishte paraparë që kjo të ndodhte të enjten, më 17 maj./Botasot
