Familja tre anëtaresh nga Prishtina po jeton në kushte mjaft të vështira për shkak se asistenca sociale që marrinë nga shteti, nuk i mjafton. Kryefamiljari është detyruar mbledh kanaçe, siç thotë ai për pak bukë, e bashkëshorten e sëmurë nuk arriti ta operojë për shkak të mungesës së të hollave. E për të njëjtin problem edhe fëmija i vetëm i tyre nuk vijojë shkollimin e mesëm.
Kjo është familja e Artan Dubrovës, e cila jeton në kushte të rënda dhe me vetëm 110 euro, mbështetje nga shteti.
Dubrova tregon se këto mjete financiare që i marrin nuk janë të mjaftueshme, pasi nuk ka shtëpi dhe me ato para paguan qira, derisa dy kryefamiljarët nuk kanë mundësi të punojnë për shkak të gjendjes së rëndë shëndetësore që kanë.
Artan Dubrova: Asistencën sociale e marrë 110 euro jemi 3 anëtar
“Asistencën sociale e marrë 110 euro jemi tre anëtarë…Kjo shumë nuk është e mjaftueshme nuk del…Pasi që në shtëpi jemi me qira, nuk po mundemi t’ia dalim, por po dal ndonjëherë të tregova që ndonjëherë marrë hekura, do kanaçe e duke mbledh kapak për një kafshatë bukë…Jetë më të vështirë nuk ka, nuk e di se si mundet me qenë…Djali ka qenë në shkollë por e ka përfundua me provime, më nuk ia ka filluar, nuk kemi kushte, mundësit për t’u shkolluar.. Shkollën djali e ka ndalu shkaku i mundësive, shkollën fillore e përfundoi me provime….Bashkëshortja ka qen e sëmurë nga veshët.. i ka dalë një mish i egër brenda në vesh, kemi pas me bë operacion por nuk kemi pas me çka, nuk kanë qenë mundësitë dhe kemi mbet… Nuk dëgjon hiç, nuk kemi pas me çka me u bërë operacion sepse kemi paguar qira edhe për tjera nuk po na dalin … Kush ka mundësi dhe më së shumti kam nevojë për një shpi, kush ka mundësi, Zoti e shpërbleftë, kush ka mundësi me na ndihmu… shëndeti im në këtë gjendje është shkak i skamjes e gjitha, nuk mundem as të përkulem, po më duhet të rri qysh e kërkon pozicionin”, tha ai.
Familja e Artanit nuk është e vetmja që përfiton asistencë sociale e që nuk i mjafton.
Sipas Agjencisë së Statistikave, numri i familjeve që kanë përfituar nga skema e ndihmës sociale, në vitin që lamë pas, është 20,379. Kurse, në vitin 2022, numri ishte më i madh për 11,3%, ose 22.980.
Kp ka kontaktuar edhe familje tjera që janë nën asistencë sociale, e të cilët thonë se nuk u mjaftojnë ndihma që marrin. Ndërkohë, Ministria e Financave nuk ka kthyer përgjigje nëse do ta rrisë shumën e të hollave që marrin familjet nën asistencë sociale.
Për një pjesë të familjeve që kanë nevojë për mbështetje, është kujdesur edhe Kryqi i Kuq i Kosovës, të cilët kanë shpërndarë ndihma për rreth 10 mijë familje me gjendje të rëndë ekonomike dhe sociale.
Armend Shala nga kjo organizatë humanitare, ka thënë se brenda vitit janë familje të shumta që ata i ndihmojnë me gjëra esenciale, por se ata i japin prioritet nënave vetushqyese.
Shala: Kryqi i Kuq i Kosovës diku brenda vitit ndihmon rreth 10 mijë familje
“Kryqi i Kuq i Kosovës diku brenda vitit ndihmon rreth 10 mijë familje në nivel vendi, të cilët i ndihmojnë edhe me pako të ndryshme ushqimore, higjienike, pavarësisht të nevojave të cilat i ofrojnë këtu, nuk është ndonjë komunë që është më e theksuar por është diçka e përgjithshme që ne e ofrojmë ndihmë në të gjithë territorin e Republikës të Kosovës…. Familjet të cilat ne i ndihmojmë fillimisht, një familje tek ne vjen i jep të dhënat bazike, adresën, një numër kontakti, ku ata janë të lokalizuar dhe një ekip i joni del në terren dhe verifikon gjendjen e tyre, i merr të dhënat nëse kanë asistencë sociale ose jo, dhe bëhet vlerësimi i tyre varësisht nga të hyrat që i kanë, ambientet shtëpiake, e të tjera dhe karakterizohen tek ne, në bazë të kategorisë edhe ndihmohen si familje. Për neve është e rëndësishme ajo pjesa që nëse familja ka nevojë për një ndihmë, të cilën qytetarët dhe bizneset e ndryshme i ofrojnë”, theksoi ai.
Shala ka thënë se një tjetër kategori e veçantë që e kanë, janë të moshuarit e vetmuar ose ata persona të cilët janë pa përkujdesje familjare. Shala tha se Kryqi i Kuq, ndihmat i përfshijnë me pako ushqimore, higjienike dhe veshmbathje, e këto bëhen në bashkëpunim me biznese dhe donatorë.
Shala: Ne i japim përparësi nënave kryefamiljare dhe pleqve të vetmuar
“Tek familjet, ne kryesisht i jepem përparësi nënave kryefamiljare që janë, duke iu ofruar pako ushqimore, pako higjienike dhe pako të tjera veshmbathje, varësisht nga nevojat që i kanë. Dhurimet që ne i bëjmë varen edhe nga ana e donatorëve ose bizneseve, kontribuuesve që i ofrojnë, kemi raste të ndryshme kur bizneset ndërrojnë sezonin, ofrojnë veshmbathje, kemi raste kur biznese të caktuar ofrojnë pako ushqimore ose higjienike ose diçka tjetër dhe këto ne mundohemi t’i dhurojmë te familjet që kanë nevojë, varësisht. Një kategori të veçante që e kemi, janë pleqtë e vetmuar ose personat e vetmuar, më shumë pa përkujdesje familjare, të cilët janë mbi moshën 65 vjeç dhe ne shkojmë i vizitojmë këto kategori, marrim një kërkesë ose një listë të nevojave që e kanë, dikush ka nevojë për veshmbathje, dikush shtrojë-mbulojë dhe kështu me radhë dhe mundohemi ato gjëra t’i gjejmë dhe t’i sjellim te këta persona”, tha ai.
Përndryshe, për ta ndihmuar familjen tre anëtareshe të Artan Dubrovës, ju mund të kontaktoni në këtë numër 049674544, ose ta vizitoni në rrugën “Tutini”, në Vranjefc.
