Zbërthimi i bisedave të koduara në aplikacionin SKY ECC, ka zbardhur disa ngjarje kriminale të ndodhura vitet e fundit në vendin tonë por edhe si ishin të organizuara bandat kryesore dhe planet e tyre. Një prej këtyre planeve është edhe ai i vrasjes së Durim Bamit me porosi nga Arben Ndoka dhe Ervis Martinaj.
Kjo luftë në botën e nëndheshme të krimit të organizuar po zhvillohej gjatë vitit 2020. Por teksa lufta mes palëve ishte e ndezur dhe secili prej tyre ndiqte njëri-tjetrin me synimin për ta vrarë, ndodh një takim i papritur.
Më 14 Shtator 2020, Martinaj është takuar me Durim Bamin dhe Valteri Bamin me ndërmjetësimin e Behar Bajrit, pjesë e një grupi kriminal në Shkodër. Por ky lajm është përhapur me shpejtësi në bisedat e SKY ECC dhe të personazheve të përfshirë.
Arben Ndoka ka komunikuar me Bardhyl Mavrajn dhe ky i fundit e ka pyetur nëse ka dijeni që Behar Bajri është personi që ka mundësuar takimin e Durim Bamit me Vis Martinajn. Ish-deputeti Ndoka i është përgjigjur duke i thënë se është në dijeni pasi e ka informuar vetë Ervis Martinaj.
Por pavarësisht takimit me Bamin, Marklen Haka në një bisedë me Martinajn, i thotë që nuk duhet t’u ketë besë vëllezërve Bami. Edhe Visi i thotë që “tani që më takuan do t’ju ruhem më shumë, ata e dinë që nuk ja u kam besën”.
