Presidentja e Kosovës, Vjosa Osmani tha se shpreson që legjislatura e nëntë të konstituohet më 15 prill. Osmani theksoi se çështja e koalicioneve është temë e partive politike dhe se ajo qëndron jashtë këtij diskutimi, ndonëse sipas saj në të kaluarën presidentët janë përzier në këto diskutime.
Vjosa Osmani potencoi se është e rëndësishme që sa më parë të konstituohet kuvendi, duke parë siç tha ajo edhe zhvillimet gjeopolitike në botë, dhe “nuk është që globi na pret neve”.
Osmani: Në të kaluarën mund të ketë pasur president që janë përzier në çështje të koalicioneve
“Për organizuesit e seancës konstituive, sepse kuvendi duhet të bëjë një sërë regjistrimesh përgatitjesh teknike ka kohë të mjaftueshme, ju uroj sukses partive politike, ju uroj sukses kuvendit të republikës së Kosovës që ai proces të shkoj sa më mirë, që është e mundshme dhe konstituimi të kryhet po me atë datë. Mirëpo siç e dini si presidente nuk kam të drejt vote dhe pavarësisht se në të kaluarën mund të ketë pasur president që janë përzier në çështje të koalicioneve, unë i konsideroj ato çështje partiake , që sipas Kushtetutës nuk janë detyrë e imja, por jam besimplotë që institucionet përkatëse në këtë rast deputetët e Kuvendit të Kosovës do të bëjnë çmos që të jetë seancë e suksesshme”, tha Osmani.
Po ashtu Vjosa Osmani potencoi se është e rëndësishme që sa më parë të konstituohet kuvendi, duke parë edhe zhvillimet gjeopolitike në botë, dhe “globi nuk pret për ne”. Tutje Osmani tha se shpreson në një kuvend funksional që mbikëqyre punën e qeverisë.
Osmani: Është me rëndësi që të kemi konstituimin e kuvendit sa më parë
“Është me rëndësi për qytetarët e Kosovës, por ju po i shihni zhvillimet gjeopolitike, nuk është që globi na pret neve, është me rëndësi që sa më parë të jetë e mundur, por gjithsesi brenda afateve kushtetuese, të kemi konstitumin e kuvendit që është hap i parë pastaj qeverinë e republikës së Kosovës, një kuvend funksional që e kryen edhe punën e mbikëqyrjes në raport me qeverinë, sepse Kosova ka shumë punë për të bërë, andaj unë dua të ju uroj suksese deputetëve të kuvendit të Kosovës të cilët janë të vetmit që kanë të drejt vote atë ditë, pas betimit me shpresë që konstituimi të jetë i suksesshëm”, tha ajo.
Osmani këtë deklaratë e tha pas takimit me sekretarin britanik.
Presidentja e vendit dje ka caktuar seancën konstituive për datën 15 prill.
Zgjedhjet parlamentare janë mbajtur më 9 shkurt dhe rezultatet nga KQZ-ja janë certifikuar javën e kaluar. Në bazë këtyre rezultateve, LVV ka dalë e para me 48 deputetë, PDK e dyta me 24 deputetë, LDK e treta me 20 deputetë dhe AAK-NISMA e katërta me 8 deputetë.
