Njohësi i zhvillimeve politike në Ballkanin Perëndimor, Anton Pançev kritikon Bashkimin Evropian për qasjen që po e përdor ndaj Kosovës. Ai thotë se masat ndëshkuese të BE-së, ndaj Kosovës janë të padrejta, pasi Kosova në veri ka vepruar në përputhje me legjislacionin dhe kushtetutën e vet. Pançev mirëpret marrëveshjen për depërshkallëzimin e situatës në veri, por nënvizon nevojën që Lista Serbe të marrë pjesë në zgjedhjet e parakohshme.
Ai në një intervistë për Kp kërkon nga Bashkimi Evropian të mos tentojë të përafrojë Serbinë përmes lëshimeve ndaj Kosovës.
Pançev, i cili është edhe albanolog, thekson se Serbia vazhdimisht po krijon tensione në Kosovë, duke ndërhyrë në punët e brendshme të saj.
Megjithëse e konsideron të nevojshme arritjen e marrëveshjes për depërshkallëzimin e situatës në veri, Pançev thotë se duhet garanci që Lista Serbe nuk i bojkoton sërish zgjedhjet atje.
Në anën tjetër, ai vë në pah edhe qëllimin e Serbisë, i cili sipas tij, është krijimi i një autonomie për serbët në Kosovë. Mirëpo, thotë se një gjë e tillë është e panevojshme, pasi Kushtetuta e Kosovës ofron mundësi të mjaftueshme për komunitetin serb.
Të hënën (10 korrik) në Bratislavë të Sllovakisë, kryengociatori kosovar, Besnik Bislimi bëri të ditur se është pajtuar me emisarin e BE-së për dialogun, Miroslav Lajçak për hapat për depërshkallëzimin e situatës në veri të Kosovës.
Tensionet në veri të Kosovës kanë filluar më 26 maj, kur kryetarët e zgjedhur në Zubin Potok, Zveçan dhe Leposaviq, kanë shkuar në objektet komunale, të asistuar nga Policia e Kosovës. Situata ka eskaluar më datën 29 maj, ku grupet kriminale kanë sulmuar Policinë e Kosovës dhe ushtarët e KFOR-it, ku rreth tridhjetë prej tyre kanë mbetur të lënduar.
