Vetëm 6 minuta lojë i mjaftuan Mirlind Dakut për të gjetur rrugën e rrjetës në kampionatin rus.
Sulmuesi shqiptar i Rubin Kazan bëri gjithçka mirë, duke ndëshkuar portierin kundërshtar me një gol për panoramë. Për të, ky është goli i katërt sezonal.
Mirlind Daku ka luajtur për skuadra të ndryshme në Shqipëri dhe Kosovë si Kukësi apo Ballkani, ndërsa spikati më pas te Mura në Slloveni.
Kujtojmë që lojtari në fjalë iu bashkua Kombëtares së Shqipërisë disa muaj më parë, duke dhënë një kontribut të çmuar në ndeshjet e fundit kualifikuese të Euro 2024.
Pritshmëritë janë shumë të mëdha për të në Europianin e verës, që do mbahet në Gjermani.
