Do të ketë përmirësim të dukshëm të kushteve atmosferike në pjesën më të madhe të Shqipërisë, duke bërë që kthjellimet dhe vranësirat e lehta të jenë dominante.
Përjashtim bëjnë zonat përgjatë shtrirjes Lindore nga Puka deri poshtë në Korçë, ku vranësirat do të jenë disi më të dendura duke rrezikuar reshje të pakta shiu.
Orët e pasdites dhe në vijim do të sjellin përmirësim të motit edhe në këto zona dhe për pasojë i gjithë territori i vendit do të dominohet nga kthjellime dhe vranësira të lehta.
Temperaturat e ajrit do të mbeten konstante në vlerat minimale por rriten maksimumet duke luhatur vlerat ditore nga 1°C deri në 21°C vlera më e lartë.
Era do të fryjë e lehtë dhe mesatare me shpejtësi mbi 35 km/h nga drejtimi Veriperëndimor duke krijuar në brigjet detare dallgëzim të ulët.
Kosova
Gjatë orëve të paradites, territori i Kosovës do të jetë me alternime kthjellimesh dhe vranësirash të shpeshta të cilat herë pas here do të gjenerojnë reshje të izoluara shiu e dëbore, kryesisht në zonat përgjatë kufirit me Shqipërinë. Parashikohet që pasditja të vijojë nën ndikimin e kthjellimeve dhe vranësirave të herë pas hershme por nuk priten reshje. Temperaturat e ajrit do të ulen lehtë gjatë mëngjesit por rriten në mesditë duke luhatur vlerat ditore nga -2°C deri në 14°C. Era do të fryjë e lehtë dhe mesatare përgjatë gjithë 24 orëshit duke arritur shpejtësinë maksimale mbi 30 km/h nga drejtimi Veriperëndimor.
Maqedonia e Veriut
Pjesa më e madhe e territorit të MV parashikohet që të jetë nën dominimin e kushteve të qëndrueshme atmosferike, duke bërë që të ketë mbizotërim të kthjellimeve dhe vranësirave të shpeshta. Më të dukshme vranësirat do të jenë në zonat perëndimore dhe jugperëndimore duke rrezikuar momente me flokë dëbore. Ndërsa në vijim do të theksohen vranësirat edhe në pjesën tjetër të MV por mundësia për reshje është thuajse zero. Për sa i përket temperaturave të ajrit do të mbeten të pandryshuara gjatë vlerave minimale por maksimalet do të rriten duke luhatur vlerat ditore nga -2°C deri në 18°C. Ndërkohë parametri i Erës do të jetë kryesisht i lehtë por hera herës mesatare duke arritur shpejtësinë maksimale deri në 30 km/h nga drejtimi permanent Veriperëndimor.
Europa
Aktivizimi i një qendre të fuqishme ciklonare në Atlantik drejt Europës perëndimore dhe Jugperëndimore, do të sjellë kushte të paqëndrueshme atmosferike në Gadishullin Iberik, Britaninë e madhe si edhe pjesërisht Europën Qendrore, ku mbizotërohen nga stuhi të forta ere dhe shira intensivë; kryesisht në Angli, Francë dhe Hollandë. Po ashtu me vranësira dhe reshje të konsiderueshme dëbore dominohen vendet Nordike dhe Europa Lindore ndërsa nën ndikimin e motit të kthjellët dhe vranësirave të lehta e kalimtare paraqiten gadishulli i Ballkanit, gadishulli Apenin si edhe brigjet e Egjeut./abcnews.al
