Një incident u raportua ditën e djeshme në Ministrinë e Kulturës, Rinisë dhe Sportit, ku ishin të përfshirë sekretari i Përgjithshëm i kësaj ministrie, Xheladin Krasniqi dhe zyrtari Miftar Latifi.
Në këtë rast u tha se sekretari kishte përdorur dhunë ndaj zyrtarit të MKRS-së.
Ndërkaq sot, si rezultat i kësaj ngjarje, sindikata e kësaj ministrie sot do të protestojë me fillim nga ora 12:00.
Protesta do të mbahet para objektit të Ministrisë së Kulturës, Rinisë dhe Sportit.
“Kjo protestë organizohet si një thirrje kundër çdo forme të dhunës dhe për respektimin e integritetit të zyrtarëve publikë, si dhe për të kërkuar që ky rast të trajtohet me drejtësi nga institucionet përkatëse”, thuhet në njoftim.
“Pjesëmarrja e mediave në këtë ngjarje është e mirëseardhur dhe e rëndësishme për të sensibilizuar opinionin publik lidhur me këtë çështje”, thuhet ndër të tjera në njoftim.
