Organizata Mediale e Evropës Juglindore (SEEMO) dënon fuqishëm sulmet verbale të fundit kundër gazetarëve dhe organeve të mediave në Kosovë, pasi veprime të tilla minojnë lirinë e shtypit dhe rolin jetësor që luajnë gazetarët në një shoqëri demokratike.
Reagimi i SEEMO-s vjen pasi që Lëvizja Vetëvendosje, partia në pushtet e Kosovës, ka ndezur polemika mbi ndërveprimet e saj të fundit rreth mjedisit mediatik të vendit.
Ngjarjet e zhvilluara filluan me një intervistë të një deputeti të Vetëvendosjes më 3 maj 2024 në Radio Televizionin e Kosovës lidhur me anëtarësimin e mundshëm të Kosovës në Këshillin e Evropës. Më tej, i njëjti person ka shkruar një deklaratë në profilin e tij në Facebook.
Sipas Asociacionit të Gazetarëve të Kosovës, ky deputet ka treguar hapur tendencë për të kontrolluar përmbajtjen editoriale të transmetuesit publik RTK, duke ndërhyrë në atë që konsiderohet si prioritet për t’u trajtuar dhe raportuar dhe sulmuar shtesë AGK-në për punën që bën për mbrojtjen e gazetarëve dhe mediave. Ai po përpiqej të diktojë se çfarë duhet të bëjë dhe si duhet të sillet AGK.
Në përgjigje të deklaratave politike, Asociacioni i Gazetarëve të Kosovës (AGK) dënoi këtë qëndrim dhe theksoi rëndësinë e lirisë së mediave dhe mbrojtjen e të drejtave të gazetarëve.
Linkun e intervistës në RTK mund ta shihni këtu: https://www.youtube.com/watch?v=7eV4HHDabXY
SEEMO konsideron se frikësimi dhe përpjekjet për të kontrolluar përmbajtjen editoriale, siç dëshmohet nga deklaratat e bëra nga figura të caktuara politike, janë të papranueshme dhe paraqesin kërcënim për pluralizmin dhe pavarësinë mediatike.
SEEMO u kërkon autoriteteve në Kosovë që të mbështesin parimet e lirisë së medias, të mbrojnë gazetarët nga ngacmimet dhe frikësimet dhe të sigurojnë që ata të mund të kryejnë punën e tyre pa frikë nga hakmarrja. SEEMO po ashtu i bën thirrje kryeministrit Albin Kurti që të merr masa ndaj partiakëve të tij nga Lëvizja Vetëvendosje të cilët sulmojnë gazetarët, shoqatat e gazetarëve dhe organizatat mediatike.
SEEMO po ashtu kërkon nga presidentja Vjosa Osmani që me një deklaratë të mbështesë mediat dhe gazetarët në Kosovë dhe të dënojë deklaratën e këtij deputeti.
Ndryshe, Organizata Mediale e Evropës Juglindore (SEEMO) është një rrjet rajonal joqeveritar, jofitimprurës i redaktorëve, drejtuesve të mediave dhe gazetarëve kryesorë në Evropën Juglindore, Jugore, Lindore dhe Qendrore.
Anëtarët e SEEMO janë në Kosovë, Shqipëri, Armeni, Azerbajxhan, Bjellorusi, Bosnje-Hercegovinë, Bullgari, Kroaci, Qipro, Republikën Çeke, Estoni, Gjeorgji, Greqi, Hungari, Kazakistan, Kirgistan, Letoni, Lituani, Maltë, Moldavi (me territorin e Transdnestria), Mali i Zi, Maqedoni e Veriut, Poloni, Rumani, Rusi, Serbi, Sllovaki, Slloveni, Taxhikistan, Turkmenistan, Turqi, Ukrainë dhe Uzbekistan.
Austria, Italia, Vatikani dhe San Marino kanë një status të veçantë në SEEMO, e cila ka mbi 3 mijë anëtarë individualë dhe media shtesë si anëtarë të korporatës.
