Kryetari i Odës së Mjekëve të Kosovës Pleurat Sejdiu, duke folur për rastin e vdekjes së 4-vjeçares nga Gjakova tha se humbja e një pacienti e sidomos kur bëhet fjalë për fëmijë është shumë e rëndë dhe kjo çështje ndikon shumë në përceptimin e publikut ndaj sistemit shëndetësor.
Në “Lajmet e fundit” në RTK, Sejdiu tha se ata që do të duhej të merreshin me përmirësimin e situatës në shëndetësi reagojnë vetëm kur ndodhin këto raste.
Ai potencoi se Oda e Mjekëve të Kosovës pret raportin nga ana e Inspektoratit Shëndetësor të Ministrisë së Shëndetësisë, dhe më tej do vazhdohet me hetimet e mëtejme.
Sejdiu më tej tha se rasti i vdekjes së 4-vjeçares ka të bëjë me sëmundje dhe jo me rrahje siç është pretenduar nga familja.
“Një gjë është tanime e ditur se kemi të bëjmë me një sëmundje dhe jo me një rrahje ashtu siç është dezinformuar opinioni publik nga ana e prindërve, dhe aty kanë nisur dyshimet se sa është dërguar fëmiu me kohë në Shtëpinë e Shëndetit, se si është trajtuar dhe nëse janë të vërteta ato pritje apo mosdiagnostifikime, referimi te niveli sekondar dhe pastaj te ai terciar. Këtu ka shumë informacione të cilat nuk përputhen me deklarimet e prindërve, prandaj opinioni publik duhet të pres”, tha Sejdiu.
“Dështimi i madh që po ndodh në sistemin shëndetësor janë protokolet, ne zyrtarisht nuk kemi protokole”, potencoi mes tjerash Pleurat Sejdiu.
