Dy dekada pas luftës në Kosovë, ende vazhdon të jetë problem uzurpimi i pronave.
Raste të tilla janë jo fort të rralla dhe shpesh i fusin në telashe qytetarët. Si pasojë e mosmarrëveshjeve për prona të ndryshme, konfliktet verbale eskalojnë në kanosje e përleshje.
Burimet brenda Prokurorisë kanë bërë me dije se një rast i tillë ka ndodhur edhe në Viti, ku një serb e ka denoncuar në Polici një person, të cilin e ka akuzuar se ia ka uzurpuar një pronë.
Sipas informacioneve të para, i dyshuari e ka vendosur një rrethojë për t’ia pamundësuar viktimës futjen, çka e ka futur në sherr.
Si rezultat i denoncimit, i dyshuari është shoqëruar në stacion policor për intervistim, me ç’rast e ka pranuar veprën për të cilën ngarkohet.
Bazuar në dëshminë e tij, të dhënë para hetuesve policorë, pronën në fjalë e ka blerë kohë më parë nga disa familjarë të viktimës.
Pas përfundimit të procedurave, Prokurori i Shtetit ka urdhëruar që i dyshuari të ndalohet për 48 orë.
