Njohësi i zhvillimeve politike në Ballkanin Perëndimor, Daniel Serwer, në blogun e tij peacefare.net ka publikuar një artikull të titulluar “Si t’i kundërvihemi botës serbe”, ku përmendet edhe Kosova për të cilën thotë se ka nevojë për serbët e saj.
Serwer shkruan se serbët në jug të lumit Ibër duket se kanë bërë paqe, “të paktën tani për tani”, me institucionet e dominuara nga shqiptarët.
“Në Kosovë, popullsia serbe është pakica më e madhe, përbën më së shumti 6% të popullsisë. Kushtetuta e Kosovës i siguron pakicës serbe mbrojtje të gjerë dhe marrëveshje për ndarjen e pushtetit. Por shumica e serbëve të Kosovës mbeten të ndarë nga shumica e shqiptarëve. Gjuhët e tyre (ndryshe nga gjuhët dominuese në Bosnjë dhe Mal të Zi) janë të papajtueshme. Serbët në jug të lumit Ibër jetojnë kryesisht në enklava me shumicë serbe. Por ata duket se kanë bërë paqe, të paktën tani për tani, me institucionet e dominuara nga shqiptarët në Prishtinë. Ashtu si komunat me shumicë shqiptare, ato me shumicë serbe kanë kompetenca të gjera mbi qeverisjen lokale.”
Ai thotë se serbët në katër komunat veriore janë më pak të integruara sesa serbët në jug të Ibrit, derisa shton se Beogradi është siguruar që serbët të refuzojnë ta pranojnë autoritetin e Kosovës.
Beogradi e ka arritur këtë, sipas Serwer, përmes “levave ushtarake, ekonomike dhe politike, duke përfshirë frikësimin nga shërbimet sekrete dhe partnerët e tyre të krimit të organizuar”.
“Katër komunat veriore me shumicë serbe të afërta me Serbinë janë shumë më pak të integruara sesa ato në jug të Ibrit. Duke përdorur levat e tij ushtarake, ekonomike dhe politike, duke përfshirë frikësimin nga shërbimet sekrete dhe partnerët e tyre të krimit të organizuar, Beogradi ka siguruar me sukses që ata të refuzojnë të pranojnë autoritetin e Prishtinës. Serbët e veriut kanë bojkotuar zgjedhjet komunale dhe janë tërhequr nga institucionet e Kosovës.”
Serwer flet edhe për asociacionin e komunave me shumicë serbe.
“Serbia dëshiron që komunat me shumicë serbe të formojnë një Asociacion. Kjo do t’u mundësonte atyre të qeverisin bashkërisht dhe veçmas nga Prishtina, si në RS. Në mjedisin e duhur gjeopolitik, Asociacioni mund të veprojë edhe si mjet për ndarjen e katër komunave veriore nga një shtet që Beogradi ende nuk e njeh. Ishte një shoqatë e ngjashme e autoriteteve provinciale që çoi në formimin e RS-së përpara përpjekjes për shkëputjen e saj në 1992 nga Bosnja.”
Ai tregon se çka duhet të bëjë Kosova sa i përket luftimit të botës serbe.
“Ajo duhet t’i bindë serbët e veriut se ata do të jenë më mirë si qytetarë të Kosovës (edhe nëse e mbajnë edhe shtetësinë serbe). Disa po lëvizin në atë drejtim, siç sugjerohet nga gatishmëria e tyre e shtuar për të marrë targa, letra identiteti dhe pasaporta të Kosovës. Por shumë nga serbët në veri kanë qenë ndër kundërshtarët më luftarak dhe ndonjëherë të dhunshëm të Prishtinës. Beogradi ia ka dalë që ta bëjë kontaktin me serbët e veriut shumë më të fuqishëm sesa komunikimin me serbët në komunat që nuk janë afërta me Serbinë.”
Serwer përmend faktin që kryeministri Kurti flet edhe në gjuhën serbe, derisa shton se është i nevojshëm zbatimi i disa marrëveshjeve. Aty përmendet edhe zbatimi i vendimit të Kushtetueses për Deçanin.
“Kryeministri Kurti po flet më shumë në gjuhën serbe të rrjedhshme. Të gjitha autoritetet e Prishtinës duhet të jenë më të kujdesshme se sa kanë qenë në të kaluarën për të shfaqur flamurin etnikisht neutral të vendit, në vend të flamurit etnik shqiptar (gjithashtu flamurin e Shqipërisë) që shumë prej tyre preferojnë. Zbatimi i shumë marrëveshjeve për ndarjen e pushtetit në kushtetutë nuk është i lehtë, por ende i nevojshëm. Kështu është edhe mbështetja financiare për komunitetet serbe dhe zbatimi i vendimit të Gjykatës Kushtetuese për manastirin e Deçanit, të cilin Prishtina e ka refuzuar deri më tani.”
Në fund, ai ka shtuar edhe deklaratën e ambasadorit Hovenier që e lëshoi të dielën sa i përket operacioneve të Policisë për mbylljen e komunave paralele në Dragash, Pejë, Klinë e Istog.
