Nënkryetari i Komunës së Skenderajt dhe kryetari i Degës së Partisë Demokratike së në këtë komunë, Sami Lushtaku, është ftuar mbrëmë në zyrat e EULEX-it në Fushë Kosovë.
Avokati i tij, Artan Qerkini, ka njoftuar se Lushtaku, është liruar pas intervistimit. Ai bëri të ditur se ish-komandantit të Ushtrisë Çlirimtare të Kosovës, i është konfiskuar telefoni nga Specialja.
Avokati ka shtuar se Lushtaku nuk është i dyshuar dhe nuk ka pas urdhërarrest ndaj tij.
“Ky veprim bie ndesh me ligjin. Sami Lushtaku nuk e ka statusin e të dyshuarit, prandaj atij i është cenuar privatësia pasi i është marrë telefoni”, ka thënë avokati Qerkini, teksa ka paralajmëruar ankesë në Dhomat e Specializuara.
Lidhur me ndalimin e Lushtakut nga EULEX-i, ka reaguar Luan Gacaferi, anëtar i Kryesisë së partisë Guxo, përcjell Bota sot.
“Shqiponjë me Albinin e pulë me prokurorët e Hagës!”.
“Mi paska ra qehra e dekës Sami babës”.
“Albini: Mos e votoni gjykatën e Hagës!
K’ta: Jo na e votojmë!
Albini: Ani votojeni pra!”, janë disa nga postimet që Gacaferi i ka publikuar në llogarinë e tij në Facebook.
Në një postim tjetër, ai ka ironizuar edhe me telefonin e Lushtakut.
“Kujt i ka hup qiky celular, e kish gjet dikush në Fushë Kosovë”, ka shkruar ai./Botasot
