PËRGATITI: SARA SHEHU
Si pasojë e mungesës së stafit shëndetësor, qendrat e mjekësisë familjare në fshatra të komunës së Prizrenit, nuk po mund t’u ofrojnë pacientëve shërbime mjekësore për çdo ditë. Pacientët ankohen se po detyrohen që të bëjnë rrugë deri në Qendër të qytetit për t’i kryer shërbimet, sidomos për kryerjen e analizave. Mungesa e biokimistëve nëpër QMF-të, është si pasojë e mosinteresimit për të aplikuar për këtë pozitë.
“Në Qendrën e Mjekësisë Familjare në fshatin Gjonaj në Has të Prizrenit, banorët ankohen se nuk po mund t’i kryejnë të gjitha analizat”.
Kjo për shkak se në këtë qendër, nuk ka të punësuar asnjë biokimist.
Mungesa e një biokimisti në QMF-në e këtij fshati, po detyron banorët të cilët kanë nevojë për këtë shërbim mjekësor, të shkojnë në Prizren. Sipas tyre, udhëtimi e më pas edhe kryerja e analizave po iu kushton atyre.
“Po duhet të shkojmë në Qendrën Kryesore në Prizren e goxha është larg. Mua po më kushton goxha shtrenjtë. E këtu në Qendër të Mjekësisë në Gjonaj s’ka kush me t’i kry analizat, është shqetësuese për krejt edhe fshatarët e mi. Po na kushton secilit”.
“Është shqetësuese, po masi këtu s’po bahen, po duhet me shku në qendër. E tash më vështirë se shumë nxehtë”.
Për vështirësitë që hasin pacientët për bërjen e analizave ka folur edhe kryetekniku në këtë qendër, Muharrem Qollaku.
“Këtu nuk kemi biokimist të punësuar, kemi vetëm një laborant që në vend të biokimistit punon dy herë në javë për pacientët. Ama këtu nuk kryhen krejt llojet e analizave se s’ka biokimist, duhet me shku në qendër pacientët”.
Mirëpo, nuk është vetëm fshati Gjonaj që ka mungesë të një biokimisti, me të njëjtin hall përballet edhe QMF-ja e fshatit Romaj. Për këtë pozitë nuk ka të interesuar.
“Në fshatin Gjonaj kemi pasur të hapur një konkurs për biokimist, por s’kemi pasur asnjë të interesuar, andaj jemi detyruar ta mbyllim konkursin. Kemi një biokimist këtu në QKMF. E njëjta situatë është edhe në fshatin Romaj. Të gjitha analizat prej atje i bijnë këtu mostrat për përpunim. Ndërkohë tjetër çështje është se këtu kemi vetëm 1 radiolog, kemi nevojë më shumë. Kemi shumë pak staf për shërbime mjekësore”.
Sipas menaxhmentit drejtues të QKMF-së në Prizren, në 44 njësitë e kujdesit parësor shëndetësor, numri i të punësuarve arrin në 500.
Ndryshe, në Qendrën Kryesore të Mjekësisë Familjare në këtë komunë, brenda ditës kryhen mbi 150 lloje të analizave.
