Numri i meshkujve të diagnostikuar me kancer të prostatës në mbarë botën pritet të dyfishohet në 2.9 milionë në vit deri në vitin 2040, ndërsa vdekjet vjetore parashikohen të rriten me 85%, sipas studimit më të madh deri më sot në këtë fushë.
Kanceri i prostatës është tashmë një shkaktar kryesor i vdekjeve dhe është forma më e zakonshme e kancerit mashkullor në më shumë se 100 vende. Por me një popullsi në plakje dhe një rritje të jetëgjatësisë në mbarë botën, një analizë e re parashikon një rritje dramatike të rasteve dhe vdekjeve gjatë 15 viteve të ardhshme, raporton Guardian .
Diagnozat parashikohet të rriten nga 1.4 milionë në vit në 2020 në 2.9 milionë deri në vitin 2040 , që do të thotë se rreth 330 meshkuj do të mësojnë se e kanë sëmundjen çdo orë.
Numri i vdekjeve në mbarë botën parashikohet të rritet me 85% brenda këtyre 20 viteve, nga 375,000 në vitin 2020 në afro 700,000 deri në vitin 2040 . Numri aktual i vdekjeve ka të ngjarë të jetë më i lartë, thonë ekspertët, për shkak të nëndiagnostikimit dhe të dhënave jo të plota në vendet me të ardhura të ulëta dhe të mesme.
Gjetjet u botuan në revistën mjekësore Lancet dhe do të prezantohen në konferencën vjetore të Shoqatës Evropiane Urologjike në Paris të shtunën./vizionplus.tv/
