Një studim ka zbuluar se gratë i interpretojnë dhe i kuptojnë emoji-t ndryshe nga burrat, kështu që herën tjetër që do t’i dërgoni dikujt një emoji, sigurohuni që ajo të interpretohet saktë, raportoi Independent. Kjo për shkak se emoji-t janë subjektive në natyrë. Ndërsa disa mund ta interpretojnë një fytyrë të përlotur si trishtim, të tjerë mund të interpretojnë lumturinë e pamasë që e bën njeriun të qajë.
Emoji-t janë një mënyrë për të shprehur ndjenjat që mund të ndryshojnë nga personi në person, nga gjinia në gjini, si dhe mosha. Ideja e shprehjes është e ndryshme për të gjithë. Hulumtimi përfshiu 523 të rritur, nga të cilët 49% ishin meshkuj dhe 51% ishin femra. Emoji-t u zgjodhën nga katalogët e Apple, Windows, Android dhe WeChat dhe pjesëmarrësve iu kërkua t’i ndajnë ato në gjashtë kategori të ndryshme të gjendjes emocionale sipas të kuptuarit të tyre.
Hulumtimi zbuloi se gratë, krahasuar me burrat, ishin më të suksesshme në interpretimin e saktë të emoji-ve në kategori të lumtura, të neveritura, të frikësuara, të trishtuara, të befasuara dhe të zemëruara. Nuk u gjetën dallime gjinore në interpretimin e emoji-ve të befasuar ose të neveritur. Dr Ruth Filik, profesoreshë e asociuar në Shkollën e Psikologjisë në Universitetin e Nottinghamit, tha:
“Ajo që më duket më interesante dhe befasuese është se ka kaq shumë dallime individuale në mënyrën se si njerëzit i interpretojnë këto emoji. Pra, ne duhet të mendojmë për rezultatet në kuptimin e dallimeve midis njerëzve në mënyrën se si ata i interpretojnë emoji-t, në vend që disa njerëz të jenë më të mirë në të se të tjerët. Ne duhet t’i mbajmë parasysh këto dallime kur përdorim emoji në mesazhet tona.”
