Studiuesit në Institutin gjerman për Astronomi Max Planck njoftuan të enjten zbulimin e dy blloqeve të reja ndërtimi të quajtura “Shakti” dhe “Shiva”, duke përdorur teleskopin hapësinor Gaia të Agjencisë Hapësinore Evropiane (ESA).
Blloqet e lashta, të vlerësuara nga 12 deri në 13 miliardë vjet, mendohet se kanë luajtur një rol në formimin e galaktikës së Rrugës së Qumështit.
Sipas një deklarate nga Instituti Max Planck për Astronominë, “komponentët e sapo zbuluar u identifikuan duke kombinuar të dhënat nga sateliti astrometrik i ESA Gaia me të dhënat nga sondazhi SDSS”.
Sipas vlerësimeve, “Shakti” dhe “Shiva” janë ndër blloqet më të vjetra të ndërtimit të Rrugës së Qumështit dhe pritet të ofrojnë njohuri të rëndësishme për origjinën e galaktikës.
Rezultatet e studimit u publikuan në revistën “Astrophysical Journal”. /AA
