Autoritetet spanjolle njoftuan të martën se të gjitha shkollat në ishujt Kanarie do të mbyllen nga e mërkura deri të hënën për shkak të nxehtësisë ekstreme.
Fernando Martin, drejtor në shkollën e mesme Santiago Santana në Las Palmas tha se, që nga fillimi i javës së kaluar, pesë ose gjashtë studentë në ditë kanë kërkuar trajtim mjekësor për probleme të lidhura me të nxehtin.
“Ne duam t’i japim përparësi sigurisë së djemve dhe vajzave në të gjitha shkollat në Kanarie,” u tha ai gazetarëve, shkruan The Guardian.
Mediat lokale thanë se ka pasur disa raste të studentëve që kanë rënë të fikët ose kanë pësuar goditje nga nxehtësia ditët e fundit në Kanarie.
Në Ishujt Kanarie, ku temperaturat janë relativisht të buta gjatë vitit shkollor, shumë pak klasa janë të pajisura me ajër të kondicionuar.
Një valë të nxehti ka mbërthyer Ishujt Kanarie për rreth 10 ditë, ku është regjistruar temperatura e dytë më të lartë e tetorit të mërkurën e kaluar, 40.6 gradë celsius.
Vapa ekstreme në Ishujt Kanarie pritet të zgjasë deri të hënën. Ndërkohë, zjarrfikësit po luftojnë ende për të përballuar riaktivizimin e një zjarri masiv që u dogj këtë verë në ishullin Tenerife.
