Kryetari i Komunës së Prishtinës, Përparim Rama, ka deklaruar se procesi i këmbimit të pronës në zonën e mbrojtur në Badovc me pronën komunale në lagjen “Prishtina e Re” ka qenë brenda ligjit dhe si proces ka nisur në qeverisjen e kaluar.
Rama theksoi se tashmë ish-partneri qeverisës PDK dhe asamblistët e tjerë kanë qenë të njoftuar për këtë pikë që ishte miratuar në Kuvend disa javë më herët.
“Këtu asgjë nuk ka qenë jashtëligjore. Pikat u dërgohen edhe asamblistëve që dërgohen për Kuvend, më pas mbahet edhe Komiteti për Politikë dhe Financa. Nuk ka pasur problem”, tha Rama.
Sipas tij, për këtë këmbim pati raportime tendencioze dhe të pavërteta.
“Kjo është raportuar si diçka e klientëve të mi. Ka qenë tendencioz dhe ka ardhur në momentin kur kemi shpallur projektin për sheshin ‘Xhorxh Bush’, ku kemi pasur mospajtime për parking të atij mediumi që raportoi. Ka thënë të pavërteta që një pronë 20-30 milionëshe po këmbehet me një pronë që nuk ka vlerë”, deklaroi Rama.
Rama sqaroi se si ishte vlerësuar prona private dhe ajo që do këmbehej nga Komuna.
“Ministria e ka vlerësuar atë tokë 8 milionë euro për 13 hektarë, e ka obliguar Komunën për të bërë ndërrim pasi është e interesit publik, ajo tokë ka pasur kushte ndërtimi. Ne është dashur ose të paguajmë para të gatshme ose këmbim, por nuk ka pasur Komuna para. Edhe kryetari i mëparshëm ka thënë duhet bërë këmbim”, shtoi më tej Rama.
Kryetari Rama më tej sqaroi se para dy viteve ishte bërë këmbimi i vetëm një pjese të tokës dhe qeverisja aktuale është dashur të vazhdojë pasi pronari i tokës i ka akuzuar për zvarritje të procesit.
“Fillimisht është bërë këmbimi i një pjese, toka e komunës 6.6 hektarë që fillimisht është ofruar është vlerësuar si 3 milionë, ndërsa 13 hektarëshi është vlerësuar si 8 milionë, pra kanë mbetur 5 milionë për të vazhduar këmbimi. Kjo nuk është në dorë të Përparim Ramës apo Komunës, e vendos Ministria sa tokë duhet të jepet”, tha Rama.
I pari i Prishtinës u shpreh se nuk e di sa është blerë ajo tokë para se të shpallej zonë e mbrojtur.
“Për këtë ekziston sistemi ligjor që duhet të merren me raste kur konsiderohet se ka shkelje. Në kushte kur komuna ose ministria e shpall një zonë të interesit publik e cila është private dhe ka pasur kushte ndërtimore, atëherë gjykata mund ta marr në dorë, pra mund të paditet komuna nga privati e të kërkoj pagesë ose padi për humbje brenda këtyre viteve që ia kanë ndalë zhvillimin”- shtoi më tej Rama. /Kallxo.com
