Një zëdhënës i ushtrisë izraelite refuzoi të konfirmojë nëse Izraeli qëndron pas ndërprerjes së komunikimit në Gaza që filloi të premten, raporton Reuters.
Kur u pyet nëse Izraeli qëndron pas ndërprerjes së telekomunikacionit, Daniel Hagari tha: “Ne bëjmë atë që duhet të bëjmë për të siguruar forcat tona për aq kohë sa duhet, të përkohshme apo të përhershme, aq sa kemi nevojë dhe nuk do të themi ndonjë gjë më tej për këtë.”
Ndërprerja e komunikimit e ka lënë territorin, që kishte relativisht ndërprerje, tash pa komunikim ndërsa Izraeli ka intensifikuar rrethimin e tij.
Shkatërrimi i lidhjeve telefonike dhe internetit e ka zhytur Gazën në një ndërprerje komunikimi dhe ka krijuar një vakum informacioni mes bombardimeve më të rënda ajrore të luftës deri më tani, raporton The Guardian.
Një pjesë e vogël e raporteve që dolën nga enklava të shtunën treguan për kaosin dhe ankthin ndërsa ekipet e ndihmës mjekësore dhe agjencitë e ndihmës përpiqeshin të koordinonin përpjekjet e shpëtimit dhe ndihmës, derisa familjet kërkuan lajme për të afërmit.
Rushdi Abualouf, një gazetar që punon për BBC në Gaza, tha se që nga ndërprerja e komunikimeve të premten mbrëma, shoferët e ambulancës nuk mund të merrnin udhëzime, kështu që ata thjesht lëvizën në drejtim të shpërthimeve.
“Ka pasur panik kudo, madje edhe këtu në Khan Younis, ku bombardimet ishin më të pakta, pasi njerëzit përpiqen të kontaktojnë anëtarët e familjes në zona të tjera për të kontrolluar se janë të sigurt, por telefonat janë ndërprerë,” shkroi ai.
“Është kaos total.”
